Land For The Landless

- Laltlanzova Khiangte

Mizoramah hian khua leh tui dik tak, ram emaw, in leh lo emaw nei lo mi engemawzat an awm tih sawi thin a ni a, thingtlang loneitu leh ranvulhtu, ei leh bar tharchhuahna khawp ram tihtham nei lo engemawzat an awm bawk. Hetihlai hian mi hausa thenkhatin ram zau tak tak an nei a, engmah tharchhuah na'na hmang lo, rula raw neih ve mai mai pawh tam tak an awma sawi a ni. Engtinnge ram nei lote'n ram an neih theih ang? Thingtlang loneitu leh ranvulhtute'n anmahni tan chauh ni lo, ram mipuite tana ei tham tharchhuak turin engtinnge ram tha lai an chan theih ang? Khawpuia khua leh tui tam takte pawhin an ram ngeiah in hmun chhete pawh an nei lo va, he Zorama hlim taka cheng tlang tur hian engemaw tal tih chu a ngai a ni lawm ni?

He dinhmun chiah hi hmanlai ram ropui Roman-ho leh Greek-hote pawh kha an lo tawng tawh. Mi hausate'n ram zau pui pui an nei a, in leh lo nei lote'n ram neih ve (change) an ngiat a, thuneitute'n 'land reform' tiin nasa takin mi retheite harsatna an sukiang a, an ram pawhin a hlawkpui thin. Amaherawhchu, ram tam takah ram zau tak tak neitu mi hausate'n mi retheite hnenah an ram an sem phal thin loh avang leh mi hausate chu thuneihna chelhtu an nih zawk thin avangin buaina a chhuak fo a, khawvel history-ah ram chungchang avanga mi retheite leh mi hausate intihbuainain hmun tam tak a luah a ni.

Japan ram pawh an bang bik lo. An ram lalber, Meiji chuan Samurai lal, Shoguns lak atanga thuneihna a laklet hlim (1868-1912) in ram nei lote hnena ram pek hna (land reform) a buaipui a, khawvel indopui pahnihna zawh hlimah Japan awptu US Occupation Force chuan land reform a ti leh nghal a, ram zau tak tak neitu (landlord)-te kuta awm thin, Japan ram leilung 80% lai chu loneimite hnenah pek a ni. Japan ram hmasawn chak takzia chu kan hre theuh awm e. British sorkar lak atanga Pakistan leh India an indan hlim pawh khan heng ram pahnihte hian land reform an buaipui ve ve a, a tirah chuan mipui lamin a pawimawhzia an hrethiam pha lo va, hun engemawchen hnuah land reform chu tihmakmawh a ni tih mipuite'n an hrechhuak tawh.

Industrial Revolution a thlen lai te, Europe ram ropui hrang hrangin an ram awp an kalsan hlimte khan khawvel pumpuiah mi rethei leh loneitute hnena ram pekna land reform a thleng nasa hle a, 1910-a intan Mexican Revolution-ah te, Communist China te, Bolivia te, Zimbabwe leh Namibia thlengin land reform hi a lar hle a ni. Africa leh Arab-te'n Europe ramte awpna atanga talchhuah an duhna lian ber pakhat chu land reform an duh vang a ni a, Cuba ramin loneitute tan liau liaua land reform a tih phei chu a pui tham hle niin an sawi. Land reform hi khawvel indopui pahnihna a tawp atang khan third world countries (Asia, Africa leh Latin America-a ram thangchho mekte) tan chuan economic lama thanchhohna kailawn (step) pawimawh tak a ni a, a bikin Taiwan, South Korea leh Malaysia-te tan phei chuan hmasawnna kailawn bul ber a ni an ti nghe nghe.

Tunlaia khawvel economy-a hmun pawimawh tak chang mek, People's Republic Of China pawh khi Deng Xiaoping khan land reform ti lo se hetiang khawpa ram ropui hi a ni lo ang an ti. Deng Xiaoping-a hunlai chuan khawpuiah mi hausa tak tak, ram zau pui pui nei an tam mai a, chung mi hausate ram engemawzat chu loneitu, ram nei lote hnenah a pe a ni.

Barbados-ah pawh sorkarin 'Land for the Landless Programme' a buatsaih a. Lo neihna atana hmun tha tur, mimal ta leh sorkar ramte chu loneitu, mahni-a ram tha lai neih ngaihna awm lote hnenah a pe a, ram pum tana hlawkpui theih tur thlai leh chaw chi hrang hrang ching turin a zirtir zui a ni.

He Barbabos-ho programme hi land reform hmanga thingtlang loneitu ram nei lote khaichhuahna tur te, mi tharchhuahsa lalut nasa lutuk loa an ram a intodelh ve theihna turte leh agriculture lama employment opportunity a awm theihna turte a ni. An ram Cabinet chuan July 2001 khan Barbados Agricultural Development and Marketing Corporation (BADMC) a din nghe nghe a, BADMC hian programme office dinin, programme manager, senior agricultural assistant, extension officer, field officer leh clerk typist an nei. Driver leh peon hi ram dang officer-te hian an uar ve vak lo a ni awm e.

Mizoram leh a chhunga chengte pawh hian mite tih angin ram nei lote hnena ram pek leh thingtlang loneitute hnena lo neihna tur hmun mumal taka thehsak hi 'good governance' kan neih theihna tur kailawn pakhat a nih a rinawm. Zimbabwe-a land reform tih tulzia sawitu Godfrey Kanyenze chuan, "Ram mipui 70% hi thingtlangah an cheng a, agriculture hi kan rama hna petu (employer) lian ber a ni a, land reform hi a pawimawh takzet a ni," a ti. Zimbabwe leh kan ram dinhmun hi a inchen viau awm e.

Engpawhnise, rorelna dik leh tha (good governance) kan neih theihna tura kan tih ngaite hi a lian a tein i tlangaupui zel ang u. Pu John Lennon-a hla thu hian a lungkuai zawng deuhin kan thu titawp ila. "You may say i'm a dreamer, but i'm not the only one. I hope someday you will join us.