Thlanmual leh Thlan laih

- Laltlanzova Khiangte

Kan hriat theuh angin kan tum vang leh kan duh vang pawh ni loin Aizawl khawpui chhung veng hrang hranga thlanmualte chu a lo khat chho tan ta. Veng hrang hrangin Aizawl daifêmah remchang kan dap ta sap sap a, veng thenkhat chuan an thlanmual a khah tak avangin khaw daia an thlanmual thar an hmang tan tawh a ni.


Aizawl khaw chhunga thlanmual a khah avanga khaw daifêma thlanmual ngaihtuah a ngai ta thliah thliah hian Mizo nuna thil pawimawh tak, tlangval tlawmngaite thlan laih chungchang a nghawng tan a, tlangval thlan lai thin tam takin khaw daia thlan laih fo chu an tlin dawna a lan loh avangin thlan lai lawkte pawh an awm tan a ni awm e.


Keini veng Ramhlun South-te pawh hi hun rei vak loah chuan Tuirial kama kan thlanmual tha turah kan la inphum a ngai ve dawn a, chhiat kan tawhin zing kara thlan lai tura tlangval kal thlak thin a ngai dawn a, thlan vur tura chhun lama awm tlang emaw, a hrana kal emaw a ngai dawn a, a hmunah nulate'n thingpui an lum a ngai maithei bawk a, thlan lai tan chaw ei a ngai maithei bawk. A nih loh vek pawhin, hnatlanga thlan laih lawkte pawh a tul ve maithei a, la tawng lo vêng chuan engnge kan tawn tur chiah kan hre vek lo a ni. Amaherawhchu, Aizawl khawpui chhunga veng hrang hrangte thlanmual a lo khat chho ta hian Aizawla chengte tan bik chuan kan Mizo nuna thil pawimawh tak, thlan laih, thlan vur, thlan laite thingpui sem leh in vui dan a tidanglam dawrh dawnin a lang. Dik tak chuan Aizawl-a thil thleng hian Mizoram pum leh Mizote chenna hmun dang a dengchhuak ve thuai thin a, hnam pum pawh a nghawng thei dawnin a hriat a ni. Chuvangin Aizawl-athlanmual leh thlan laih chungchanga kan hmabak tur hi a hun a lo thlena ngaihtuah chawp chuk chuk loin ngun taka lo ngaihtuah lawk a thain a rinawm.






Veng hrang - thlanmual hrang:
Aizawl hi plan mumal awm loa hetia lo awm ta a ni tih chu kan hre theuh ang a. A hmaa khawpui ni lo kha a lo khawpui ta a, khawpui a lo nih rei takah chuan 'Village Council Court' han tihte pawh a rem lo chho tan a, Municipal Council-te pawh kan sawi ri ta a nih hi. Kei ve mai mai pawh hian Aizawl khawpui ve riang ruang tawha Village Council a han awm thluah maite hi chu awm lo ka ti ve a, khawpui khaikhawmtu tur Municipality ka sawi ka sawi ve a ni. Hetiang deuh hian khawpuia chengte'n mahni veng pual theuha thlanmual kan nei pawh hi a thingtlang zia ti zawnga sawi theih niin ka hria. Khua a lo than zel avangin a hmaa veng mawng deuh leh fal deuha thlanmual awm thinte kha veng laili lai takahte a lo awm ta a, khawpui chhung laili tak taka thlanmual awm fer fur pawh hi thil nihdan phung pangngai chu a ni chiah lo lo'm ni ka ti. Amaherawhchu mahni veng chhung leh veng hnai deuha kan inphum thei leh thlan kan lai thei erawh chu kan zavai atan thil lawmawm tak a ni theuh awm e. Mahse khawpui chhunga kan thlanmualte a lo zo ta a, veng hrang hrangin thlanmual la nei hran zel mah ila kan chenna hnaih takah chuan kan inphum thei lo thuai dawn tho tih a lang chiang reng mai.


Khaw chhunga thlanmualte a khah hnu pawha mahni veng thlanmual tur neih theuh zel a la tul avang hian Aizawl dai vel chu thlanmual a ni deuh chuk mai dawn tih kan mitthla thiam awm e. Vengtinin a hrang theuha thlanmual tur ngaihtuah pawh a buaithlak viau tawh a, thlanlaih leh thlan vur bakah in vui tura kal pawh a hautak chho zel dawn tih a chiang reng bawk. Engtia tih nge tha ber ang le?


Thlanmual intawm a tha lo maw?
Dream ka nei a, chu chu hei hi a ni. Aizawl khawpui hian thlanmual pakhat emaw, pakhat a rem chiah loh pawhin a tam thei ang berin thlanmual intawm ila nakin zel atan Aizawla chengte chuan kan felfai phah ka ring tlat a ni. Thih man a to lutuk loh na'n sorkarin a thlawna inphum theihna turin dai rem lai deuha ram ruak hi theh ta ang sela, thlanmual pakhat kan neih phawt hnuah thlan hi tlangval tlawmngaite'n an lai zel dawn nge hlawh fa kan ruai ang tihte pawh ngun zawkin ngaihtuah leh ila a indawt dan a fuhin ka ring.


Ram dang khawpuia an tihdan hre deuh awmte pawh ka han zawt kual a, keini anga veng (locality) tina thlanmual nei hi chu an lo awm meuh lo. A hnai deuh entirna'n han hmang ta ila, Rangoon khawpuiahte pawh Muslim thlanmual, Christian thlanmual, Buddhist thlanmual etc. an ti a ni awm e. Jerusalem-ahte pawh thlanmual pakhat lianpui a awm mai hi. Aizawl khawpui chhunga kan thlanmualte a khah rau rau chuan thlanmual intawm ve tur zawnga inngaihtuah hi a tha khawp ang. Mahse hetiang lamah hian tunge mawhphur ka hre ve chiah lo. Sorkar hmalakna tur chu a ni phawt ang a, sorkar pui ka tih mai, Congress Minister kalkhawmte nge, LAD nge, VC kalkhawmte nge, Urban Development lam nge, DC nge, Aizawl Development Authority nge, eng ber hi nge ni aw..? Aizawl Development Authority hi an thu hmel deuh berin ka hria. A hriain min han hrilh mai teh u. Ka duhtawk phawt ang e. #