Porn - Popular Culture

- Laltlanzova Khiangte

Porn chu pornography lam tawi a ni a, printed emaw, visual emawa mipat hmeichhiatna (sex) lam tarlanna hi a ni. Mizote'n blue film tia kan lo hriat thin pawh hi khawthlang lamah chuan porn movie tiin an sawi thin a, porn movie tih hi a sawi dan tur dikzawk a ni.


Mi thenkhat chuan porn hi thil bawlhhlawh tak, sual ngawih ngawihah an ngai a, mahse mi thenkhat tan chuan an nuna thil pawimawh tak pakhat a ni thung. Khawthlang lama cheng tam takte tan phei chuan tunlai nunphung pangngai, popular culture a ni mek a, internet-ah phei chuan thil dang zawng aiin a tam emaw tih tur a ni.


Keini ramah pawh chiang takin data nei lo mah ila, thalai leh puitlingte'n mahni in lama Computer an kawlah te, mobile phone-ahte leh Office hrang hrang computer-ahte porn hi movie emaw, thlalak emaw kawl an tam hle niin sawi thin a ni a, Mizo porn ngei pawh mi video siam leak out palh hmuh tur a awm ve zeuh zeuh ta bawk.


Hetianga porn lar chho em em leh popular culture ang hiala a awm hi a film chhuako a tam em avangin thil mak a ni lo ti zawng pawhin a sawi theih a ni.

Porn a tam!

America-a film siamna hmunpui, khawvel pawhin film lama chungchuang bera an ngaih hmun, Hollywood atang khuan kum khatah film puitling zali vel tlangzarh a ni a, pornography industry atang chuan kum khatah movie (film) zasarih zet tlangzarh an i. Kindered Spirits tih ziaktu Kusum Sawhney chuan, "Thil awmdan dik tak chu, pornography hi enna tur nei chuan anmahni bedroom-ah an en theuh a ni," a ti.

Porn lek lek pawh

Hollywood film tam tak hi Cable TV-a a lo chhuah hi chuan chhungkuaa en theih tura paih ngai lai lai an paihte a lo ni tawh thin tih kan hre theuh awm e. Mahse a original tam takah hi chuan ruak kengkung leh sex lam tarlanna a nasa em em a, tunlai thalai film tam takte phei chu porn movie ni si lo, fiamthua zahmawh tarlan a ni fo a ni.


Film chi hrang hrang i en thin ngei ang a. Love story-ah te, Vampire film-ahte leh action movie-ahte leh zel pawh sex lam tarlanna hi a awm ta zel a, camera hian hmeichhe awm te, hmeichhe mawngte leh hmeichhe malte hi a hawi nasa em em tih kan hmu thei ang.

Pawmtu an tam ta

Cable TV atanga chhuah TV channel hrang hrangte chuan a ngial a nganin porn movie hi an chhuah lo tih kan hre theuh a, heng TV channel-te hi chu thlifimtu an awm thin vang a nih a rinawm. Amaherawhchu personal computer leh mobile phone-a porn movie neihte hi chu mi tam tak rilruah mi pangngai lo nihna pawh a ni tawh lo niin a lang a, entirna'n, tlangvalin a computer-ah porn movie engemawzat dah se, a thiante chuan piangthar loah an ngaih phah lem lo vang. Hetiang nunphung pangngaia pornography pawmna hi kan ramah chauh ni lo, India ram pumpuiah pawh a nasa a, khawvel ram dangah phei chuan a nasa leh zual a ni. Nupa hian porn movie en dun ta se, tunlaiah chuan thil tha taka ngai mi engemawzat an awm ang a, hun rei vak lo kaltaah kha chuan nupaa porn movie en dunte chu thil zahthlak leh sual lian taka ngai an tam em emin a rinawm.

Ngaihdan chi hnih

Tunlai khawvelah chuan cartoon-ah pawh hmeichhe hnute lian deuhte pawh hmuh tur a tam ta a, porn movie pawhin kan inchhung a rawn luhchilh nasa ta. Chutih lai chuan ngaihdan chi hnih insual a awm reng a. Mi thenkhat chuan pornography-ah hian hriat ngai loh emaw, hmangaih zawng ni miah lo pawh mipat hmeichhiatna hmanpuinate a lan nasat avangin nupa leh inngaizawng inkarah nasa taka inhriatthiam lohna inrinhlelhnate a thlen thei niin an hria a, mahse mi thenkhat chuan nupaa porn movie en dun hi nupa sex life nasa takin a chawikanga, inhmangaihna a thlen niin an hre ve thung a ni.

Addict theih

Pornography hi addict theih tak a ni a, film tam tak a awm avang leh tunlaiah chuan inpek chhawn zung zung a awlsam avangin pakhat i en tawh chaun aia hmuhnawm i zawng rilru reng tawh ang.


Chumi zawhah chuan pornography naran chu hmuhnawm i tihna a lo bo ang a, thlalak emaw, film emaw pawh a pangngai ngawr ngawrh chu nin chin i lo nei ang. I en tirha i phurna kha ang i en thar apiangin neih i duh ang a, mahse a tir lam chu a tluk tawh dawn lo a ni.


I addict leh addict loh inzawt thin rawh. Entir na'n, porn movie i en nasat lutuk avangin hmeichhia leh mipa i en dante pawh a danglam vek thei a, porn zawng ngawr ngawra mi i thlir tawh a nih chuan i addict hle tawh a ni ang. A nih loh vek pawhin, porn movie thar apiang chu i ngaihtuah huam a ni maithei a, pornography-in i nun a control leh control loh nangmah lo inzawt ve ang che.

Popular culture

Pornography hian kan ramah pawh buk a khuar hneh tawh hle tih kan pawm theuhin a rinawm a, mipat hmeichhiatna lamah nasa takin kan rilrute a tihharh avangin a tha lo zawnga a thawh chuan mi tam tak tan chhiatpui theih tak a ni ang a, a chunga kan sawi tak anga hmang thiam pawh a awm theih tho va, tun tum atan chuan pornography hi popular culture a ni tawh mai em? Chutiang taka kan nunphunga a beh tawh chuan kan thatpui ang nge kan chhiatpui ang? tih zawhna hi kan han chhawpchhuak a, engtinnge chhiartute'n kan chhan dawn ve le?